Алтайым менің – асқарым менің,
Армандай биік асқағым менің.
Сағынышқа жаным таппады дауа
Тапса да шіркін басқаның емін.
Сонда өткен менің балалық шағым –
Япыр-ай, неткен қас-қағым едің.
Алтайым менің – асылым менің,
Алысқа сенен асығып едім.
Жанарға енді жас толды неге
Жақұтты жердің жасығы ма едім.
Жастығым өтті, жалыным қайда
Жарқ етер қайда жасыным менің.
Алтайым менің, ақ күнімбісің,
Ақ күнім менің – шаттығымбысың.
Ұядан ұшып, қияға самғап,
Шалғайға қанат қақты бір құсың.
Шарықтап жүріп шалдықтым бүгін
Алтайым енді – тәтті мың түсім.
1997 жыл
